قلبي (شعر شعبي )

اطش جروح كلبي بريح العتاب
واعاتب والعتب ماينفع وياك

انتلاگه بشوك لكن مثل الاغراب
وعطر حجيك ملامه واحس بجفاك

واحن ليك بغيابك حنة احباب
واسولف ليه عنك من اريد اسلاك

تمر ساعات بعدك بيه ارتاب
واهدي ظنون گلبي بذكر طرواك

وثگيل العمر ما يگظي بلاياك
تهده جروح همك من بلاياك
تگلي الگلب ماجاني بلاياك
انت الضيعت عنوانك عليه

وتفز صفنات شوگي بدگة الباب
وارد مكسور خاطر ضني الگاك

وتعن دمعات هجرك رايده جواب
متعاتب الوجنه دموعي لولاك

معاند عشك گلبي وياك ماتاب
حمل ذنبي الگلب من بيه خلاك

فرشت جروح بعدك جوه التراب
نبت جرحك بليله شلون انساك

شتسئل ياجرح من بعدك الطاب
هوايه جروح گلبي وكله تتناك.

بكاروك الكلب هزيتك ولوليت
تجازيني من افوتن ايدك اتهزهه
خذت صورة لدمعتي بفرحتي بملكاك
تراويهه للشماته تــكول بجيته